توقّع الوضع النقدي الحالي قبل عامين!

عاد ونشر  الصحافي والمحلل السياسي ماهر الدنا ما كان قد كتبه في الـ 2018:

بكل أسبوع في 20 مؤسسة عم تعلن افلاسها وتسكّر وتفلّل الموظفين بدون أي تعويضات

بكل أسبوع في 2000 عيلة عم بتصير بلا مدخول

ما حدا عم يحكي شي!

ما حدا عم يجيب سيرة!

أهم محل كهربائيات بالبلد فلّس

حتسمعو بعد كم يوم بأهم محل مجوهرات بلبنان والدول العربية حيعلن افلاسو

شركات صرلا عشرات السنين فاتحة عم تنتهي، هي وأصحابا وموظفينها وعم يختفي أثرها

الليرة عالحفّة وكل واحد بيطمكن كذّاب ابن كذّاب ابن كذّاب

عند أوّل مفرق حيجو ليدعمو الليرة حيلاقو الدولار صار بـ5000 ليرة أو أكتر

راحو جابو مصاري من سيدر وسرقوهن ما ضل منّن ليرة

الـ950 ألف وظيفة يلي انحكى عنّن كانو رقم كتير دقيق، بس مش حيتأمنّو، هول يلّي عم نخسرن

ما تسمعو للوعود الكاذبة وما يكبر بعينكن ولا حزب وولا مسؤول لأن كلّن صغار، كتير صغار، بلا اي استثناء

عم يتخانقو عوزير من هون ووزير من هون ونحنا اليوم بـ8 الشهر في ناس المصاري يلّي تديّنتهن خلصو، غير المعاش

الناس بالفعل بلّشت تموت الجوع ونشرات الأخبار عم تحكي عن تشكيل حكومة وتحاصص!!

أكيد، ومن دون نقاش، الجرايم والسرقات حتزيد والسبب هو السلطة..

الناس حتاكل بعضا والإرهاب يلّي بعدناه عنّا حيصير هو أسلوب حياة..

السياسيين مفروض يكونو مرعوبين عحياتن وعولادن وعلى ايدين نسوانن المليانة ذهب وساعات، ما بعرف على شو مطمّنين هلقد..."

وبعدما كتبها بـ 3 أيام، أي في الـ 2018 زار أحد المعنيّين بالشأن النقدي والمالي اليوم، ليسأله أحد الاشخاص الذين يرافقونه عن نظرية الدنا بأنّ الدولار سيصل الى 5000 ل.ل. وسأله عن وضع حسابه بالدولار إن كان من المنطقي أن يسحب دولاراته من البنك.. ليجيبه "المعنيّ بالشأن النقدي والمالي" الذي أصبح اليوم وزيراً أنّ هذا الكلام "محض خيال". 

هذا "المحض خيال" جعل الدولار يلامس الـ 10000 ل.ل. وحرم معظم الشعب اللبناني من قوت يومه ولقمة عيشه.

هذا "المحض خيال" أوصل أشخاصاً كهذا "المعنيّ" الى موقع الحكم انطلاقاً من "تفاؤله المفرط".

هذا "المحض خيال" سيودي بنا الى الهاوية وثمّة من يعدّ أرواحاً كما يعدّ دولاراته المخزّنة!

المصدر : السياسة