بالوقائع.. رشيد الخازن يردّ على المشككين بفوز شقيقه في الانتخابات

كتب شقيق النائب فريد هيكل الخازن، رشيد الخازن، عبر صفحته على موقع "فيسبوك" ما يلي: 

"الى كل المشككين بنتيجة فريد هيكل الخازن ومصدقين خبرية صندوق الصوانة رح خبركون خبرية هالصندوق :

- الساعة ٦ الصبح بيوصل عسراي جبيل صندوق من قلم الصوانة منتخب فيه حوالي ال٤٠٠ ناخب واخد فيه المرشح علايحة تحالف حزب الله والتيار الوطني الحر رائد برو حوالي ال٣٥٠ صوت والمرشح محمود عواد علايحة القوات اللبنانية حوالي ال٢٠ صوت وكل باقي اللوايح والمرشحين حوالي ال٣٠ صوت

- هالصندوق بيوصل مغلقو مفتوح ومش مختوم اصولاً وبيعترض عليه محامي القوات اللبنانية الاستاذ غابي جرمانوس

بهالوقت محامي لايحتنا المحامي عماد الخازن لي كان موجود بغير غرفة مع غير لجنة قيد بيسمع الضجة وبيفوت وكمان بيقدم اعتراض عهالصندوق وبيطلب الغاء نتيجتو (السهم الاصفر)

- بتجتمع لجنة القيد المعنية وبتاخد قرار انو الصندوق صحيح (السهم الاحمر) بيرجع محامي لايحة قلب لبنان المستقل بيعترض عقرار رئيس لجنة القيد وبيطلب احالة الصندوق علجنة القيد العليا للنظر فيه ( السهم الاخضر)

هيدي الوقايع متل ما هيي وبيقدر كل شخص يطّلع عالمحضر الموجود بحوزة مندوبي كل اللوايح بما فيون محامي لايحة القوات اللبنانية الاستاذ جرمانوس يلي كمان دون اعتراضو عليه اضافةً للجان القيد وجمعيات مراقبة الانتخابات متل الlade والبعثة الاوروبية وغيرون

اضافةً انو صندوق مش اخدين في غير ٣ اصوات وغيرنا فوق ال٣٠٠ صوت كيف بدو يغير نتيجة الانتخابات لصالحنا ؟؟

بتمنى عالكل يقرو ويتأكدو من كل خبرية قبل ما يحكمو وما يسمعو لحجج الخاسرين ونحنا جاهزين لكل مراجعة وتوضيح. 

وشكراً لكل الاصدقاء والمحبين يلي وقفو حدنا وبنوعدكون متل ما تعودتو علينا نضلنا حدكون من هلق لاخر نهار بحياتنا."