دافيد عيسى: لننصرف الى حل هموم الناس والبدء بقيام دولة فعلية

كتب السياسي دافيد عيسى على صفحته على فايسبوك:

"رح قول شي لازم ينقال اليوم قبل بكرا، وحتى قول ربي اشهد اني بلغت...

البلد وصل الى الانهيار التام ما بقى في قطاع ماشي من الماء للكهرباء للاتصالات للصحة للمصارف الخ وما بقى فينا نضل كل واحد ممترس محله وعم بخبرنا شو عمل بالانتخابات وشو صار يمثل وخصمه شو صار يمثل، كلنا منعرف انه بلدنا ما في ربحان وخسران بلدنا  قائم على التفاهمات بين طوائفه وما حدا بيقدر يلغي الثاني.

اسمعوني منيح نحنا كمسيحيين اولا وكلبنانيين ثانيا يجب علينا اولآ احترام الميثاقية الطائفية التي جعلت من بري مرشّحاً وحيداً للطائفة الشيعية وثانيآ وبكل وضوح وصراحة نحن بحاجة لشيعي وازن بطائفته ومعتدل و بفكر لبناني نضل نقدر نحكي معه... من هون بحب اسأل شو هي الخيارات الثانية غير  نبيه بري حدا يقلي؟

 اما الكلام حول الفساد وغيره ما هيدا بينطبق على العديد  ممن اعادهم الشعب مؤخرآ بالانتخابات الى تحت قبة البرلمان ( وما حدا يزعل كلنا منعرف هل الشي) كرمال هيك عم قول خلينا ننتبه هيدي الشعارات حلوة كثير بس الشعارات شي والواقع شي ثاني.

 البلد امام مفترق خطير الناس جوعانة الدولار صار بحدود ٣٧٠٠٠، وكلنا منعرف انه كل فريق يلي وصله بالانتخابات اليوم هيدا سقفه، من هون المفروض نخرج  من الجو المشحون يلي عم نعيشه على المستوى السياسي  وننصرف لحل  هموم الناس والبدء بقيام دولة فعلية، وهذا يبداء من اختيار حكومة أكفاء ونظاف  ورئيس جمهورية جديد يعملون بانسجام وبجدية على وقف الهدر والفساد داخل ادارات الدولة ووزاراتها واعادة أموال الناس ضمن رؤية واضحة تضع البلاد على السكة الصحيحة وتخرجه من النفق المظلم يلي عايشين في."