سدّ شبروح يستضيف نشاط رياضي سياحي ترفيهي نهاية الإسبوع الحالي

ممكن نشوف السدّ على إنو شي جامد وكبير، وممكن نشوفو شي بيجمع الميّ أهم عنصر بالحياة، وعلى الأكيد إنو ب آب 2023 السدّ رح يخلق أمل وفرح، وهيك مع سد شبروح يلّي رح يستضيف للمرّة الثالثة نشاط تحت عنوان Extreme Energy Event 3rd Edition برعاية وزارة الطاقة والمياه ومن تنظيم جمعية لَ كسروان يلّي بتترأسها نائبة كسروان _ الفتوح ندى البستاني خوري. 

هل نشاط الرياضي السياحي الترفيهي بيحترم كافة الشروط البيئية وبحافظ على سلامة المياه وعلى السلامة العامة يلّي دايماً بتكون هي الأولوية على كل شي ثاني.

من 11 وحتى 13 آب رح يمتد مشوارنا يلّي بيشمل Hiking بطبيعة جرود كسروان مع سباق ترياتلون بيتضمن بالتراتبية سباحة ودراجات هوائية وبيخلص بالركض بمحيط السدّ، والجوائز رح تتوزع بحفل الختام نهار الأحد الساعة 7 المسا.

ولأن النشاط بيحمل إسم Extreme Energy ما بيغيب عن بال المنظمين الExtreme Sports والأساس فيها هي ال Bunji Jumping فوق الميّ من على إرتفاع 80 متر ليعيش المشاركين شعور المغامرات مع فريق من المتخصصين يلّي بيهتموا بأدق شروط السلامة العامة، مع فرصة لإستكشاف كسروان وشبروح وفارايا من فوق عبر المنطاد يلّي رح يرفعكن بسما لبنان وهيك بتعرفوا ليش قالوا عنو قطعة سما عالأرض.

Extreme Energy بيغطي كل الأعمار والأذواق، كرمال هيك لمحبين التخييم بالطبيعة رح يكون في مخيّم تحت النجوم، وبنفس الوقت بالساحات حول السدّ رح يتوزع عارضين لكل أنواع المأكولات. وولادكن رح يلعبوا بالمنطقة المخصصة لإلهن ورح يحضروا مسرحية kazadoo نهار السبت 12 آب الساعة 6 مساءً. 

نصيحة لكل المشاركين ما تفلوا بكير لأن كل يوم رح ينختم بسهرة للصبح مع DJ ومطربين، فمثلاً ليلة الجمعة 11 آب رح تكون By Palms والفنان برهان الشعّار، أما السبت 12 آب فرح تكون مع   8ème artيلّي رح يقدمولنا الفنانين فرج حنا وتامر نجم. والأحد ختامها مسك by elefteriades ومع الأسطورة طوني حنا وبلال The Gipsy Prince والمطربة فاديا نجم.

من بعد كل الأزمات يلّي مرقت بلبنان عموماً وكسروان الفتوح خصوصاً، إن كانت صحية أوإقتصادية أوإجتماعية أوسياسية، بيبقى الفرح والترفيه أساس بهل بلد يلّي شعبو بحب الحياة والحياة بتلبقلو، كرمال هيك إجت هل فكرة وكمّلت على مدى 3 سنين، وكل سنة أنجح من يلّي قبلها. ومكملين فيها إيماناً من جمعية لَ كسروان بضرورة إعادة الحياة وتنشيط الدورة الإقتصادية بجرد كسروان، هل منطقة يلّي بقيت تاريخياً مقصد السواح وأساس للمهرجانات. كونوا كثار لنفرح ونغني ونعيش المغامرة وننقل لكل العالم صورة لبنان الحقيقية، صورة لبنان يلّي ما بموت برغم كل الصعاب.

المصدر : روني العاقوري - السياسة