يا معالي القاضي... رح تِقضِي علَينا

كتب قزحيا ساسين في "السياسة"

يا مَعالي وزير التّربيِه

يا قاضي حالِف يَمين بْيُحكم بالعدل

وِبْإسم الشّعب اللبناني، كلّ الشّعب

شو ناطر تا تِعلن تسكير المدارس والجامعات، بْ كلّ لبنان، عالقليلِه، كلّ هالأسبوع المليان موت وخوف ودمّ وتهجير وزُلّ وحاجِه؟

ناطر تقصف إسرائيل كلّ لبنان، ضيعَه وضيعَه، مدينِه ومدينِه، تا تخَبّرنا إنّو رح تسكّر المدارس؟

بْ ساعِتا لا تتعزّب يا معالي القاضي العادل، بِتكُون توابِيتنا والتياب السّود سَكّرت كلّ شي بقي مفتوح، ولَوْ ربْع فتحَه بالبلد.

إنته عم تقرا يا معالي القاضي العادل بُوستات اوْلاد الجنوب والبقاع... اللي عم يقُولو فيا: "سامْحونا، يمكِن ما بقا نتلاقا".

إنته شايف شلّالات السيّارات الزاحفِه من الجنوب والمناطق الوِلعانِه صَوب المطارح اللي فيا أقلّ موت ودمّ ونار؟

إنته عارف يا معالي الوزير العادل، إنّو مش كلّ الناس قاعدين حدّ المدارس والجامعات، اللّي عم تقُول إنّو يوم التدريس فيا عادي؟

وبِشَرفَك يا معالي القاضي العادل، كيف بِيكُون يوم تدريس عادي بْ يَوم حرب مش عاديِّه؟