تامر حسني يكشف تفاصيل الوضع الصحي لابنه آدم

كشف الفنان تامر حسني لأول مرة عن الأزمة الصحية التي مر بها نجله آدم، موضحًا أنه خضع لعمليتين جراحيتين صعبتين نتيجة انفجار الزائدة الدودية، بسبب تأخر اكتشاف الحالة، رغم أن الأعراض لم تكن مقلقة في البداية سوى ارتفاع بسيط في درجة الحرارة.

ووجه تامر رسالة إلى الآباء والأمهات عبر منشور على صفحته الرسمية في "فيسبوك"، قال فيها: "مش قادر أوصف قد إيه أنا ممتن لكل الناس اللي دعيت لابني آدم، دعواتكم وصلتني في كل مكان، من هنا ومن تليفوني وتليفونات القريبين مني. آدم عمل عمليتين كبار بسبب الزايدة، اللي كانت أعراضها مجرد سخونية، وده اللي خلاني أشارككم التجربة".

وأضاف: "أنا بقول كده علشان أنبّه كل أب وأم، ما تستهينوش بأي سخونية عند أولادكم. مش دايمًا الموضوع بيكون برد عادي. اعملوا سونار واطمنوا، يمكن الزايدة مش تبان من أول كشف، لكن المتابعة والضغط الصح من الدكتور بيبين كل حاجة. الأيام دي سمعت عن حالات كتير شبيهة... الزايدة خادعة فعلًا".

وتابع تامر كلامه بتأثر شديد: "لازم نتأكد أكتر من مرة قبل ما توصل لمرحلة الانفجار، لأن بعدها المشاكل بتكون صعبة جدًا، وأنا ابني مرّ بتجربة مؤلمة، لكنه شجاع والحمد لله، ومستنيين نتايج التحاليل، وبدعواتكم ربنا يعدي مرحلة الخطر على خير".

وختم تامر رسالته بالدعاء لابنه ولكل الأطفال: "يا رب اشفيه وعافيه، هو وكل أولادنا. آدم بطل وهيتحمل، وإن شاء الله ربنا يكرمه ويقومه بالسلامة. شكرًا من قلبي لكل حد دعا له أو اهتم وسأل، سواء عرفنا أو لا. أنا شايف قلوبكم بدعي ليه من محبتكم، وربنا يحفظكم ويحفظ أولادكم، ويديكم الصحة والعافية".