إلى محمد رعد

كتب رجل الأعمال اللبناني مرعي ابو مرعي:

إلى محمد رعد، نائب أمين عام ورئيس كتلة حzب الله النيابيّة.

１. وين كانت الميثاقيّة سنة ال٩٢ بس قرّروا المسيحيّي يقاطعوا الانتخابات النيابيّة ترشحاً وانتخاباً، ورشحتوا انتو نواب عنهم ربحوا ب ١٠ أو ٢٠ صوت، وحكمتوا انتو وبيت الأسد لبنان على فترة ١٥ سنة؟

２. وين كانت الميثاقيّة بس كانوا المسيحيّي عم بطالبوا بحريّة، سيادة واستقلال وما كنتوا تردّوا عليهم؟

３. وين كانت الميثاقيّة وقت المسيحيّي والسنّة والدروز والشيعة الأحرار طالبوا سنة ال٢٠٠٥ بخروج سوريا وإنتو رفعتوا شعار *شكراً سوريا* وطالبتوا ببقاء الاحتلال السوري بلبنان؟

４. وين كانت الميثاقيّة سنة ال ٢٠٠٦ بس قررتوا لحالكم وبلا ما تحكوا مع أي حدا تعملوا حرب ودمّرتوا لبنان واقتصاده، وكلّفت حربكن ٨ مليار دولار بين أضرار مباشرة وغير مباشرة؟

５. وين كانت الميثاقيّة بس انقلبتوا على حكومة فؤاد السنيورة وسكرتوا الوسط التجاري لبيروت؟

６. وين كانت الميثاقيّة بس قرّرتوا تعملوا شبكة اتصالات لإلكن بلا ما ترجعوا للدولة؟

７. وين كانت الميثاقيّة بس قرّرتوا إنّكم تعملوا ٧ أيار وتحرقوا بيروت وتفوتوا على مناطق السنّة والدروز؟

８. وين كانت الميثاقيّة بس قرّرتوا تطلعوا على سوريا وما تردّوا على حدا وترتكبوا مجازر بحق الشعب السوري بعدنا لليوم نستحي نحكي فيها؟

９. وين كانت الميثاقيّة بس قرّرتوا تعملوا القرض الحسن وتخرجوا عن المنظومة المصرفيّة؟

１０. وين كانت الميثاقيّة بس قرّرتوا تستعملوا الحدود اللبنانية للتهريب؟

１１. وين كانت الميثاقيّة بس قرّرتوا تستعملوا الحدود البريّة لأمور عسكريّة؟

１２. وين كانت الميثاقيّة بس كنتوا تعملوا شي اسمو وحدة الساحات مع سوريا وإيران، وإجا قاسم سليماني يعمل خطابات عنترية من لبنان؟ 

１３. وين كانت الميثاقيّة بس قرّرتوا تسكروا المجلس النيابي لسنتين ونص لتفرضوا ميشال عون رئيس للجمهورية لأنو حليفكن؟

1４. وين كانت الميثاقيّة بس بثورة ١٧ تشرين نزل المجتمع كلّو عالأرض وعم بطالب بإصلاحات وإنتو الوحيدين يلّي منعتوا السلطة تتجدد وطالبتوا ببقائها؟

１５. وين كانت الميثاقيّة بس سمّيتوا رئيسَي حكومة من دون ما تأخذوا برأي الأكثرية المسيحيّة والسنيّة من بعد ثورة ١٧ تشرين؟

１６. وين كانت الميثاقيّة وقت انفجار ٤ آب، عطّلتوا القضاء وهدّدتوا القضاة؟

１７. وين كانت الميثاقيّة بالطيونة وعين الرمانة بس قرّرتوا تنزلوا وتعتدوا عالعالم لأن كان في قاضي عم يعمل شغله؟

18 . وين كانت الميثاقيّة بحرب الإسناد، وقرّرتوا تعملوا حرب كلّفت لبنان لليوم فوق ال ١٥ مليار $ بين خسائر ومباشرة وغير مباشرة؟

19 . وين كانت المثاقية بس كنتوا تعملوا إجتماعات مجلس الوزراء دون المسيحية وكان بدكن تعينوا قائد جيش وكذا مدير عام ؟ 

هودي كلّن بدلّوا عالميثاقيّة؟

حاج محمد، انت ما فيك تختصر الشيعة. هنّي طائفة شريكة ومؤسسة بلبنان، طائفة عندها ما يكفي من الفكر والعلم والثقافة والاحترام.

انتو عم تستعملوا الميثاقية غب الطلب لتفرضوا هيمنتكن. 

حديثنا موجّه لإلكن منّو حديث للطائفة الشيعية.

 ارحموا شعبكن، ارحموا بيئتكن. ارحموا لبنان وشعبو قبل ما ترحموا حالكن. 

حاج محمد، تأدّب، زبّط شكلك وهيّا إلى العمل السياسي. السلاح خلصت وظيفته. السلاح دمّركم ودمّر البلد. إنتو اللي مضيتوا القرارات بإيديكن.  إنتو اللي وصّلتوا حالكن لهون. إنتو اللي خلّيتوا كل بيت لبناني مقهور. إنتو اللي اختصرتوا الطائفة الشيعية بالسلاح وما قدّمتولها شي غير الموت والدمار. تفضلوا على العمل السياسي. اشتغلوا سياسة. اعترفوا إنّو زمن السلاح والفرض والفيتويات والنفوذ الإيراني وخبريّة وحدة الساحات ولّت إلى غير رجعة. 

لبنان الجديد لكل العالم.