عبد المسيح: أطلب شفاعة قدّيسنا نقولا لكل رجال الدولة الحقيقيين بلبنان

كتب النائب أديب عبد المسيح عبر حسابه على منصة "أكس": 

"عنا قدّيس بالكنيسة البيزنطيّة من العيار التقيل، اسمو نيقولاوس أو نقولا (Nicolas). الولاد بيعرفوه كبابا نويل، ونحنا ولاد البحر هو شفيعنا، وهو كمان شفيع سلاح البحريّة بروسيا. المهم... من كم يوم كان عيده. جبت سيرتو اليوم تذكيرًا باللي صار من حوالي 1700 سنة بمجمع نيقيا سنة 325 م، لما هالأسقف العظيم هجم على أريوس وكفّفو كف عالمكشوف لأنّو كان عم يهرطق ضدّ أساس الإيمان يلي الكنيسة ماشية عليه لليوم. وما خاف لا من ملك ولا من حدا، مع إنّو الإمبراطور قسطنطين كان حاضر وراعي للمجمع. من قلب هالقصة، بطلب شفاعة قدّيسنا نقولا لكل رجال الدولة الحقيقيين بلبنان، حتى يتمثلوا فيه ويسفّقوا كف لكل "أريوسي" جديد متغلغل بمفاصل الدولة، ولكل مهرطق بالدستور، وبالوطن، وبالشعب. ويقدروا يضربوا بيد من حديد (وكفوف كمان) كل مين ولاؤو برا البلد، وكل فاسد وحرامي ومحرّض وهرطوقي".