بالصور: فحص كورونا بالسيارة في مستشفى المعونات... ومواطنة تروي التجربة المميزة

كتب بول ولارا نون على صفحتهما على فيسبوك:

"حتى نبعد عن أجواء الدراما... رح خبركن إختبار صار معي بمستشفى سيدة المعونات الجامعي... إختبار لما نزلت أعمل فحص الكورونا:

- اول شي أنا بفتخر إنو مستشفى بقضاء جبيل هوي الأول بلبنان ليعمل فحص الكورونا Drive thru... يعني أنا ما اضطريت ابداً إنزل من السيارة... القصة كلها أخدت ١٠ دقايق... وصلنا بالسيارة... لقينا فريق طبي كامل واقف عالطريق ناطرنا، دفعنا المبلغ من شباك السيارة... أخدوا التذكرة ورقم التلفون... وقربنا عاليمين... وإجت ممرضة تشرحلي كيف بتسير آلية الفحص بكل لطافة.

- بعد شوي، بتقرّب الطبيبة... بعتقد إسمها دكتور جيانا... أكيد مع كامل اللباس الواقي والكفوف وكل مشاهد النظافة... بتحكيني وبتسألني عن العوارض وبتشرحلي شو لازم أعمل في حال كان الفحص إيجابي... خبرتني إنو قبل بيوم إجا حوالي ٢٠٠ شخص عملو الفحص وما طلع معن كورونا... عملنا الفحص... قالتلي النتيجة رح تطلع بنفس النهار تأنطر تلفون من المستشفى...

قلتلا: ممكن أنا دق بعد الظهر لإتطمن؟

جاوبتني: اعذريني... بس ما عم نرد على ولا اتصال من الناس في ما يتعلق بالنتايج... حتى من اصحاب العلاقة... لأنو للأسف ايام الجيران عم بيدقوا ليعرفو جيرانن إذا معن كورونا... وهيدا شي عم بيزيد التنمر وتشويه السمعة والنفور... بليز انطري اتصالنا او اتصال الدكتور بيتر...

صراحة... كِبِر قلبي... شو هالرقي بالتعامل... شو هالمهنية! مستشفى عانت كتير مع الكورونا وتعرضوا الممرضين والأطباء فيها للخطر... اليوم عملت خدمة عالطريق حتى ما تعرض الناس للخطر مع مراعاة كل العوامل النفسية والطبية. 

ملاحظة: انا ما إلي شي بهالمستشفى وما بشتغل فيها... بس حلو نضوي عالإيجابي بزمن السلبيات والحمدالله ما طلع معي كورونا.

ألف تحية لهالمستشفى الجبيلية مع كل العاملين فيها جوا وبرا تحت الشتي والشمس! الله يحميكن ". 

يذكر أنّ السيدة لارا نون خضعت لفحص كورونا وأتت النتيجة سلبية. 

تجدون الصور مرفقة بالخبر