خطيب سحر فارس.. بعد شهرٍ على الفاجعة.. مازال يأمل أنّ فراقها حلم!

كتب الشاب جيلبير كرم للشهيدة في الدفاع المدني سحر فارس، وهي الشهيدة الاولى في السلك العسكري في لبنان التالي:

"عروستي الحلوة ملاكي الحارس

صارت الساعة ٦:٠٧ ،صارو ٢٨ يوم غايبي عني ،صار الك ٢٨ يوم محروم منك ومن صوتك ومن شوفتك ومن ضحكتك ومن غمرتك ومن حماسك ومن هضامتك ومن عيونك الحلوين كتير ،صارو ٢٨ يوم وبعدني بقول حلم وانشالله بوعا منو ، ٢٨ يوم وكل يوم عم كون ناطرك اكتر من يوم ، ٢٨ يوم والوجع عم بي زيد اكتر من يوم ،كل يوم عالساعة ٦:٠٧ قلبي بيولع من اول وجديد ، كل يوم عالساعة ٦:٠٧ بحس بشي جوّاتي انشالله ما حدا بحس في ، عالساعة ٦:٠٧ بحس اني خسرت كلشي بحياتي يلي هوي انت ، انت يا قلب قلب قلبي.

عيد ميلادي كان بي ٣ آب ، قلتلك اوعى تعمليلي شي متل كل سنة لان عيد ميلادي ما بيعنيلي ابداً ، قلتيلي معقول عيد ميلاد الغالي يقطع هيك ! قلتلك وجودك حدّي ومعي هني كل يوم عيد بالنسبة الي ،انت بالنسبة الي عيد ، عيد ضحكتي ، عيد سعادتي ، عيد هدفي وحلمي ومستقبلي ،انت عيد كلشي فيّي ، ما قبلتي الا ما يصير هيدا التاريخ يعنيلي و فلّيتي بي ٤ آب ، انا حا قلك انو عيد ميلادي ما كان يعنيلي وهلق صرت اكره تاريخ ميلادي.

قالولي شوف حالك خطيبتك الملاك اول شهيدي انثى بالسلك العسكري بتاريخ لبنان ، قلتلن خطيبتي كنت شايف الدني ولبنان والكرة الارضية من عيونها.

الله يحرمن اغلى ما عندن بحق وجعي ، ووجع امك وبيك واخواتك وصهرك ورفقاتك،بحق وجع اهلي ، بحق وجع كل ام وبي واخت حترق قلبا ، بحق كل مرا ترملت على ايديكن، بحق وجع كل لبناني الله يحرموا اغلى ما عندوا يلي قتلكن.

وعدي الك يا عروس ، عالارض كنت آخدلك حقق وما اسكت ، وكانت ثقتك فيّي عميا ،وعدي الك انت وبالسما بين احضان العدرا و يسوع انو اذا ماكان في عدالة عالارض مش رح انطر عدالة السما ، حا اخدلق حقق وحق رفقاتك الابطال بإديّي".

المصدر : رصد السياسة