كتبت الاعلامية ماغي عون:يمكن لأول مرة بزمنا، العالم كلو ونحنا كلنا، عم نواجه مع بعضنا نفس المعاناة.

من 4 سنين. هالبيت المليان حب، بيت العطاء، بيستقبل ناس قسيت علين ظروف الحياة وخلتن ينوجعو لوحدن. بس نحنا واياهن قررنا كمان انو الحب قرار. والعطاء قرار.

والتعاضد قرار. والتكاتف قرار. والخدمة قرار. وكل هالمشاعر هني "الانسان". #كلنا_لبعض .

اليوم كمان قرارنا أقوى. قررنا من اول يوم بهالأزمة وتنحافظ على سلامتن وصحتن نخلي مسافة بيناتنا ما تعرضن للعدوى. وهالمسافة ما منعتنا نأمنلن كل حاجاتن الضرورية وخصوصا طعامن اليومي.

صحيح اشتقلن هالبيت واشتقنا نخدمن ونغمرن بس القرار الأسلم بهالفترة كان انو نكمل نطبخلن ونخدمن من بعيد. لانو الاهم ما حدا منن يجوع او يبرد او ما ياخد دواه.

مشان هيك من أول نهار بأزمة الكورونا أخدنا كل الاحتياطات اللازمة وعم نوزعلن أكلن اليومي من البوابة الخارجية للمركز. على أمل يرجع هالبيت ينتلي وبوجودن وبركتن.

_ اذا كنتو حابين تساعدونا. يلي منعوزو أكتر بهالفترة:

خبز - معلبات على أنواعا - مربى - علب بلاستيك لحفظ الطعام.

الاتصال على الرقم : 01488773 او 71900902