رسالة من أحد طلاب الجامعة اللبنانية الى رئيس الجامعة.. فهل تصل اصوات هولاء؟

تداول رواد مواقع التواصل الاجتماعي رسالة كتبها أحد طلاب الجامعة اللبنانية إلى رئيس الجامعة، وجاء فيها:

رسالة  لرئيس الجامعة اللبنانيّة ، البروفيسور فؤاد ايّوب المحترم. 

بعد التّحيّة و السّلام،

نحن مش مناح.

نحن الوف الطّلاب و الطّالبات مش مناح.

هلق شيلك من وضع الجامعة المتراجع  كل سنة لورا. و شيلك من الانهيار الحاصل بالبلد.

نحن فهمانين انّو في مشكلة، تتمثّل المشكلة فيك و ب ادارتك و بالادارة المركزيّة و النّظام التحاصصي يلي راكب بالبلد اجمالًا.

بروفيسور، 

نحن رح ننزل ( و البعض نزل و خلّص ) مرغمين على الجامعة، نعمل امتحانات . 

ما تكذب. 

هيك بصراحة تامّة. 

ما تقول رح توزّع كمّامات لان ما في.

ما تقول رح تقيس الحرارة لان الحرارة عم تنقاس عالكاميرا بس.

ما تقول الوضع تحت السّيطرة، الوضع مش تمام ابدًا.

الجامعة مش حجار.

الجامعة بشر ، طلّاب(ات) و موظّفين(ات) و دكاترة.

انت ، و ادارتك من وراك عم تخاطرو ب كل واحد فيهن.

لتسجّل موقف . عم تاخد قرار مش مبني على ولا دراسة.

مش مستعد حتّى تعطي مبرّر و لو بسيط ليش عم تاخد هيك قرار.

نحن الطّلاب و الطّالبات ما قادرين نعمل شي. غير هيك كذب. بصراحة يعني. لان مشتّتين و موزّعين و مضغوطين و تعبانين و ما عنّا وقت لشي.

انت مصر تاخد قرارات دون اي اساس .

و يلّي ما عجبو يفل او يسقط ( في دكتور هيك قال وحياتك).

ادارتك ما عملت شي قدّام انهيار الميزانيّة.

السّنة الجاي شو الحل؟ 

وراق مافي .صيانة ما في.معدّات و مختبرات ما في.

شو الحل؟

شو عم تعمل لتلاقي حل؟

انت يا ريّس مستهتر بصحتنا، و نحن قرفانين من الحال بشكل انو نازلين و امرنا لالله.

بس بعدين شو؟

لازم مصلحتنا و صحّتنا تكون اولويّة.مش " انهاء العام الدّراسي "هيك كيف ما كان.

اذا مبسوط بالمستشارين يلي حواليك، هولي زقّفو ليلّي قبلك و رح يزقفو ليلّي بعدك.

التّاريخ ما بيرحم يا فؤاد.

و رح يسجّل انك مرقت على هاي المؤسسة و رجّعتها سنين لورا.

مش قدّ الحمل فل.

والسّلام".